國際米蘭對祖雲達斯相遇，今季兩隊分別有頭牌射手球星離隊，國米賣走了盧卡古，祖記開季前亦有瘟神朗拿度逃亡，賽前可以話少咗好多話題性。
名帥對決
大家俾啲深度，其實今場呢個MatchUp，雙方教頭不失為焦點，兩隊今季換了教練，細恩施蒙尼恩沙基喺前列球會拉素修行多季，有過幾段長時間高光表現，穩奪意甲最有前途少帥名銜，今季升格執教爭標球隊考牌，季初至今，國米成績沒有太大動盪，這已經實在唔容易，試想想多少教練初教豪門都未能1Take過?史巴光頭列提、加斯柏連尼、馬沙利、加度素、迪尼利、費拉拿、大恩、派路等等初教豪門爭標隊都敗興而回，企都企唔穩。用呢把尺去度，就引證細恩嘅氣質不凡。咪住，咁就更加應該讚賞艾歷尼啦，當年由蚊型球會卡利亞里跳班教AC米蘭即奪聯賽冠軍，更加係天生不凡。
話細恩教得好大家會好意外咩，又好似冇，皆因拉素國米基本陣式都係352，成件事個難度係低咗嘅，所以咪冇人高調讚細恩囉。囧叔重掌祖記，面對嘅難度又唔一樣，難度唔低但對比佢離開前，現時人腳又其實更有潛力上限更高，你可以見到佢都有更多憧憬同新鮮感，球隊好快重回正軌，防守比以往更硬，一波連勝加零封，氣勢如紅，而整體越見進步。
細節決定鹿死誰手
今場國家打比，戰術戰略性強，球員狀態亦勇，加上如先前所講兩隊都在佳態，兩隊不論在速率上或者水平上今仗都有上佳發揮，成場波都由細節決定。
上半場，國米相對形勢主動，計頂級球星上略勝，全場以迪斯高、巴利拿、佩列錫表級數carry全隊。巴利拿雖然沒有太多致命傳送或攻門，但幾乎所有對抗都贏，係場面稍稍佔優的主因。佩列錫攻防兩端，除了起腳攻門差少少係近乎完美發揮，進攻盤帶傳中極俱威脅，更可怕係回追回每一球祖記右路進攻的古亞達度同後備上陣基艾沙，直至被換出一刻。
上半場國米其實具威脅埋門係零，開紀錄的入波係來自賓拿迪斯治因傷離場時的短暫人數優勢，加上少許運氣之助，當然，能把握咁短時間嘅優勢其實好難。球波係左轉右邊下，再由右路經冇人看管的史堅尼亞回傳中路引致查漢路古有起腳空間，省中人中柱再由迪斯高快反應補中射空門。過程中史堅尼亞獲得嘅空間正正來自賓拿迪斯治個位。
囧帥一貫的算無遺策 成場波鋪排同發揮皆完整
客氣讚完對手，講講智勇雙絕嘅囧帥，今場有好多地方都別出心裁。
首先，用上玄冥二老收起年青力壯嘅迪列，配以巴西左右護法，讓攻防之間5後衛、4後衛的轉換不著痕跡，去應付對手兩翼衛拉空傳中的闊度或兩名中場的肋部進襲，國米兩條經脈都被剋制，呢啲已經唔係陣式，係陣法。
第二，4411的輔鋒位置，唔用大巴或基艾沙，用咕嚕專責貼實對手派牌人波索域，已經令對手運作暢順度大減四成，完全令國米無法建立Momentum。賽前有祖迷朋友講波索域好Fit，當時我已指出那場對拉素的17個成功長傳係因為冇人跟佢，囧會有計唔使怕，沙里你看到嗎？呢個貼身安排迫使好多時候，國米需由中堅，直接長波交到前鋒作背門停球，但迪斯高呢下獨門絕技亦幾乎能控下每一球，呢度必須高度讚賞，尤其在下半場，祖記落後下壓前迫搶，但迪斯高能停下每一球長傳，令每個全隊迫搶無效，係非常消耗祖記體能。
第三，周中歐聯對辛尼特時，我已指出，懷疑黑人之恥麥堅尼狀態上有進步，同睇馬晨操一樣，翻步輕咗好多。囧似乎又打返生佢，輪換係囧爺的硬道理，今場打比大膽用佢做正選結果又係驚喜，雖然仲係柒柒哋，但中前場之中體能保持得最好係佢，除此之外，留意到佢防守時不斷左右望去度同隊友距離去企位，非常集中。做到防守零犯錯，期望低之下佢值得高分。
一貫的算無遺策，雖然技術上對手稍稍佔優，但反而祖記在射門次數和威脅上，比國米更到肉，Well，即使只係偶然性的攻門。反正頭六十分鐘就係打消耗戰，將迪巴拿同當紅嘅基艾沙放在後備席上，早已擺明係以下半場決勝負。當61分鐘，國米換入加利亞甸尼，展露出求守傾向，比賽速率下降，隨即放入迪巴拿、基艾沙，打進攻型352，人地縮我就谷，立時掌控比賽的主導權，迪巴拿負責回撤分球兩邊由辛度同基艾沙作突破，兩邊加強傳中。最後更換入艾法美路同巴西新仔卡奧，變成343，表現出氣勢，亦算吸引眼球。
反而追和的十二碼，只係過程中的一件小事，唔算係我對今場的著眼點；當中的爭議性，係好得意，但冇興趣討論。因為最後能否追和也好，成場波其實鋪排同發揮上都非常完整，最後階段的強攻亦有氣勢和威脅就夠。別忘記對手係入波最多嘅意甲球隊，亦必須認識到，現時對手仍稍稍在祖記之上，能夠令對手近乎無任何有效攻門，其實係非常了不起。
